Ndihmëssekretarja e Shtetit për Çështjet Evropiane dhe Euroaziatike, Karen Donfried, është deklaruar pasi situata në mes të Kosovës dhe Serbisë është tensionuar, pas bojkotimit të institucioneve në katër komunat veriore nga serbët lokalë.
Sipas Donfried, tensionet në veri të Kosovës duhet të zvogëlohen sepse nëse përshkallëzohet situata, jetët e paqeruajtësve vihen në rrezik.
“Ne jemi duke u marrë 24 orë në ditë me çështjen e monitorimit të situatës në veri të Kosovës. Serbia dhe Kosova të zbatojnë marrëveshjet e arritura”, ka deklaruar Donfried për RTSH, transmeton Portali Dukagjini.
“Ne e kemi mirëpritur propozimin gjermano-francez. Mendojmë se ka hapësirë për progres. Së bashku me BE-në mbështesim progresin, SHBA mendon se zhvillimet e fundit janë shqetësuese, nuk është zgjidhje braktisja e institucioneve”, ka shtuar ajo.
“Të gjitha palët duhet të marrin hapa për qetësi dhe për siguri. Bëjmë thirrje për uljen e tensioneve në veri të Kosovës. Situata nuk duhet të përshkallëzohet, jetët e atyre që janë paqeruajtës atje janë në rrezik. Tensionet në veri të Kosovës duhet të zvogëlohen”, ka përfunduar ajo.