Pas mbledhjes së kryesisë së Kuvendit të Kosovës është bërë e ditur se këtë javë do të mbahen dy seanca plenare.
Të enjten e 17 nëntorit do të mbahet seanca plenare ku në rend dite do të jetë buxheti për vitin 2023.
Ndërsa të premten e 18 nëntorit do të trajtohen pikat e mbetura nga seancat e kaluara në mesin e tyre edhe gjendja në shëndetësi.
Shefi i Grupit Parlamentar të Partisë Demokratike të Kosovës (PDK), Abelard Tahiri ka thënë se PDK-ja ka kërkuar votimin e një rezolute për gjendjen e shëndetësisë në Kosovë, sepse sipas tij është e papranueshme që ky sektor kaq i rëndësishëm për një kohë të gjatë të mbetet pa ministër.
“Kemi degradim të veprimeve, kjo po ndikon në xhepin e qytetarëve të Kosovës, sepse ata po detyrohen të blejnë medikamentet pavarësisht gjendjes së shëndetësisë në Kosovë”, ka vijuar ai.
Ndërkaq për buxhetin e vitit 2023 që pritet të jetë në rend dite këtë të enjte, shefi i GP të AAK-së, Besnik Tahiri ka thënë se është një buxhet “totalisht pa vizion dhe i pareflektueshëm për gjendjen që është Kosova”.
Po ashtu për situatën aktuale në veri të vendit, ai ka thënë se AAK-ja ka propozuar një interpelancë me kryeministrin Kurti, por që sipas tij është shumë shqetësuese që në një situatë të tillë “ai të gjendet jashtë vendit”.