Një person është vrarë nga një sulm raketor rus që u përhap së fundi në kryeqytetin e Ukrainës, Kiev, ka thënë kryebashkiaku Vitali Klitschko, shkruan BBC.
Ekipet e shpëtimit morën një trup nga një ndërtesë banimi e goditur në rrethin qendror Pechersk, ka thënë Klitschko.
Operacionet e kërkim-shpëtimit vazhduan punën e tyre, ka shtuar ai.
Zelensky: 85 raketa goditën Ukrainën, priten 20 të tjera
Presidenti ukrainas Volodymyr Zelensky ka thënë se 85 raketa janë lëshuar kundër Ukrainës të martën e 15 nëntorit dhe 20 të tjera pritet të godasin vendin.
Në një video të shpërndarë në Telegram, ai gjithashtu ka paralajmëruar banorët që të qëndrojnë në strehimore.
Nënkryetari i zyrës së presidentit, Kyrylo Tymoshenko, ka thënë se situata në të gjithë vendin ishte “kritike” pasi raketat goditën objektet energjetike, duke detyruar mbyllje emergjente dhe duke zhytur në errësirë pjesë të Kievit.
“Terroristët rusë kryen një tjetër sulm të planifikuar në objektet e infrastrukturës energjetike,” ka thënë ai.
Situata në kryeqytetin Kiev ishte “jashtëzakonisht e vështirë”, ka shtuar ndër tjera ai.
Gjysma e Kievit pa energji elektrike pas sulmeve me raketa
Të paktën gjysma e popullsisë së Kievit nuk ka energji elektrike gjatë ditës së martë si rezultat i mbylljeve emergjente pas sulmeve me raketa ruse, ka njoftuar kryetari i bashkisë së qytetit.
“Për shkak të një sulmi masiv raketor industria e energjisë filloi mbyllje emergjente të energjisë elektrike në të gjithë Ukrainën,” ka thënë Vitali Klitschko, shkruan BBC dhe transmeton Portali Dukagjini.
“Në kryeqytet, të paktën gjysma e konsumatorëve janë pa energji elektrike”, ka shtuar ai, duke deklaruar se mbylljet ishin një “hap i domosdoshëm për të balancuar sistemin energjetik dhe për të shmangur aksidentet e pajisjeve”.
Përveç ndërprerjeve të veçanta emergjente në Kiev, operatori kombëtar i rrjetit, Ukrenergo, ka theksuar gjithashtu ndërprerje emergjente të energjisë për “të gjitha kategoritë e konsumatorëve” në rajonet veriore dhe qendrore ku janë parë dëmet më të mëdha në linjat e energjisë.