Pasi që mori shtetësinë shqiptare, këngëtarja Dua Lipa ka reaguar me një postim në rrjetin e saj social, Instagram.
Dua Lipa është shprehur falënderuese ndaj presidentit të Shqipërisë, Bajram Begaj dhe kryetarit të Bashkisë së Tiranës, Erion Veliaj. “Po ndihem shumë krenare”, ka potencuar këngëtarja Dua Lipa.
Këngëtarja nga Kosova dhe e famshme në të gjithë botën, Dua Lipa, këtë të dielë ka marrë shtetësinë shqiptare.
Presidenti i Shqipërisë, Bajram Begaj i ka dhënë shtetësinë shqiptare Dua Lipës dhe ka pritur këtë të dielë artisten e mirënjohur dhe vlerësoi talentin e saj, shpirtin artistik si dhe angazhimin e saj në mbështetje të kauzave sociale.
“Kënaqësi e veçantë t’i dorëzoja dekretin e shtetësisë shqiptare këngëtares së talentuar dhe të famshme në të gjithë botën! Në vigjilje të 110-vjetorit të shpalljes së pavarësisë së Shqipërisë, nderojmë jo vetëm ato personalitete që në të shkuarën kontribuuan dhe ndihmuan në krijimin e shtetit të ri shqiptar, por edhe të gjithë ata që me kontributin e tyre në çdo fushë të jetës i japin vlerë identitetin shqiptar dhe na bëjnë krenarë në çdo moment”, ka thënë Begaj.