Analisti Visar Ymeri, ka thënë se kryeministri i Kosovës, Albin Kurti nuk ka pasur mendim strategjik, sa i përket vendimit për targat e paligjshme “KM”, pasi sipas Ymerit, i pari i Qeverisë është dashur që ta dëgjonte në fillim Ambasadorin e Shteteve të Bashkuara të Amerikës, Jeff Hovenier, pasi kjo do t’i jepte atij një “plumb” në bisedimet e Brukselit, për marrëveshjen finale ndërmjet Kosovës dhe Serbisë.
Tutje, ai ka thënë se serbët në vitin 2013 nuk kishin hyrë me vetë dëshirë në institucionet e Kosovës, por të shtyrë nga Beogradi, për shkak të marrëveshjes së Brukselit. Sipas Ymerit, ata nuk kishin qenë asnjëherë të integruar plotësisht në institucionet e Kosovës, pasi kishin qenë të kontrolluar edhe nga Serbia.
“Ne e dimi se kush i ka detyruar qytetarët serbë të dalin me votime edhe për kë do të votojnë, asnjëherë nuk ka qenë situatë demokratike, por ka qenë e rëndësishme që të kesh një integrimi formal që kjo pas një kohë të shndërrohet në normë”, ka theksuar ai në Debat Plus në RTV Dukagjini.
Ndërkohë, Ymeri ka folur për premtimet kryeministrit, i cili ka thënë se ai ka pretenduar që të këtë qasje me ndryshe “edhe kjo ka reflektuar më se shumti te vendimi për targat. U dorëzuam në momentin e fundit. Nuk po them që nuk është dashur të dëgjohen amerikanët”.
“Po të kishte qenë kryeministri Kurti me strategjik në mendim edhe t’i dëgjonte SHBA-të në fillim, kishte mundur ta përdoret këtë si një kërcënim real, që nëse kështu, ne atëherë intervenojmë edhe atëherë do të kishte pasur vlerë, sepse tani nuk ka, sepse tani ne kemi treguar një zmbrapsje edhe nga frika, gjykuar nga deklarata e kryeministrit për mediumin FAZ”, ka shtuar ai.
Ymeri ka përfunduar duke thënë se po t’i dëgjonte Kurti amerikanët, do të ishin dy dobi pasi sipas tij “kryeministri do të ishte si konstruktive ku kishte kërkuar një ndihmë më të madhe, një aspekt tjetër siç është përmbajtja e marrëveshjes, edhe e dyta e kishte mbajtura kërcënimin si kredibil që nuk është i përdorur edhe zmbrapsur për shkak të frikës”.