Qendra Klinike Universitare e Kosovës, ka bërë të ditur se pjesëtari i Policisë së Kosovës, i cili u plagos në veri është jashtë rrezikut për jetë.
Polici, i cili ishte plagosur në kraharor, sipas QKUK-së, është pranuar për trajnim të mëtejmë në Klinikën e Kirurgjisë Torakale.
“Qendra Klinike Universitare e Kosovës njofton se sot rreth orës 8:30, një pjesëtar i Policisë së Kosovës, i lënduar mbrëmë, është pranuar në Qendrën Emergjente, pasi kishte marrë trajtimin e nevojshëm në Spitalin e Përgjithshëm të Mitrovicës. Ekipi i Klinikës Emergjente bashkë me mjekët konsultantë nga klinikat përkatëse, kanë kryer të gjitha ekzaminimet e nevojshme dhe rasti, sipas mjekëve, është jashtë rrezikut për jetë. Pacienti është pranuar për trajtim të mëtejmë, në kuadër të Klinikës së Kirurgjisë Torakale”, thuhet në njoftimin e tyre.
Drejtoresha e Spitalit të Përgjithshëm të Mitrovicës, Luljeta Zhubi, për Portalin Dukagjini ka thënë se ai është plagosur në pjesën e shpatullës dhe se nuk kanë arritur ta nxjerrin plumbin nga aty, kjo është arsyeja se pse ai, sipas saj, është dërguar në QKUK.
Policia e Kosovës, mbrëmë në veri, është sulmuar nga një grup kriminal i armatosur me armë të gjata, me ç’rast një polic ka mbetur i plagosur.