Kryetari i Aleancës për Ardhmërinë e Kosovës (AAK), Ramush Haradinaj, të premten, ka pritur në takim Ambasadorin e ShBA-së në Kosovë, Jeff Hovenier, për të diskutuar për situatën aktuale në vend.
“Bashkë diskutuam për zhvillimet e fundit në vend, me theks të veçantë për situatën e sigurisë në Republikën e Kosovës”, ka shkruar Haradinaj në Facebook.
Haradinaj ka thënë se largimi nga këshillat amerikane në këtë situatë të brishtë të sigurisë mund t’i kushtojë Kosovës, duke theksuar se “për AAK-në, partneriteti strategjik me ShBA-të është jetik”.
“Improvizimet dhe largimi nga këshillat amerikane në një periudhë kur situata është shumë e brishtë, janë të dëmshme e mund t’i kushtojnë Kosovës”, ka thënë tutje Haradinaj.
Ai ka falënderuar ambasadorin Hovenier për mbështetjen e vazhdueshme që siç thotë ai, ShBA-ja i jep Kosovës dhe për angazhimin e tij personal që është shumë i rëndësishëm në këtë periudhë.