Me rastin e Ditës Ndërkombëtare të Mbulimit Universal me Shërbime Shëndetësore, Shoqata e të Drejtave të Pacientëve në Kosovë – PRAK ka mbajtur një tryezë me temën “Pse pas 8 vjetësh nga miratimi i ligjit nuk kemi sigurime shëndetësore?!”.
Ushtruesja e detyrës së ministrit të Shëndetësisë, Dafina Gexha ka thënë se ngritja e sigurimeve shëndetësore është sfidë për sektorin e shëndetësisë.
Ajo ka thënë ndër të tjera se aktualisht po punojnë në Sistemin e Informacionit Shëndetësor dhe se reformat e tyre përfshijnë edhe aspektin e sigurimeve shëndetësore, raporton kp.
Implementimi i skemës të sigurimeve shëndetësore, Gexha tha se është prioritet i MSh-së.
Kryetarja e Komisionit për Shëndetësi, Fatmire Kollçaku, tha se ligji aktual ka nevojë për plotësim-ndryshime, derisa theksoi se i gjithë fokusi i Fondit për Siguri Shëndetësore është kthyer vetëm tek trajtimi jashtë vendit.
Kollçaku tha se aktualisht janë në fazën e përgatitjes së pakos bazike për sigurime shëndetësore.
E u.d. i drejtorit të Fondit për Sigurime Shëndetësore, Bujar Kaçuri tha se 80 për qind i aktivitetit të Fondit fokusohet në programin për trajtim jashtë vendit në program me të cilin sipas tij, janë evidentuar shumë probleme por edhe borxhe mbi 30 milionë euro.
Ai tha se deri më tani nuk është bërë asnjë ndryshim në udhëzimin administrativ sa i takon këtij programi.
Kaçuri u shpreh se përkundër sfidave që kanë me një plan konkret dhe harmonizim te gjithë akterëve shpresojnë që në një të ardhme jo te largët të fillojnë implementime të skemës për sigurime shëndetësore.