Kryetari i Listës Serbe, Goran Rakiq, përmes një videoje nga fshati Rudar në Komunën e Zveçanit ka kërkuar lirimin e ish-policit serb, Dejan Pantiq i cili u bë shkas i barrikadave që ngritën disa qytetarë serbë në pjesën veriore të Kosovës, përkatësisht në rrugët që çojnë drejt vendkalimeve kufitare me Serbinë, Jarinjë dhe Bërnjak.
Duke folur nga barrikadat në Komunën e Zveçanit, Rakiq ka thënë se “populli serb do paqe”.
Ai në video nuk i paraqiti fare barrikadat e vendosura në këtë zonë.
“Ne kërkojmë që qytetarët tanë të arrestuar padrejtësisht, të lirohen, dhe që kryeministri i Kosovës, Albin Kurti t’i tërheqë njësitet që i dërgoi në veri, të ndalojë keqtrajtimin e fëmijëve tanë dhe të ndalojë ndjekjen e serbëve”, ka thënë Rakiq, duke mos sjellë asnjë provë për këto pretendime.
Ndërkaq, presidenti i Serbisë, Aleksandër Vuçiq, bëri të ditur se pas seancës së 15 dhjetorit, Qeveria e Serbisë do t’i dërgojë kërkesë komandantit të misionit të NATO-s në Kosovë, KFOR, për të dërguar deri në një mijë forca të sigurisë në Kosovë.
Beogradi zyrtar qysh më 8 dhjetor paralajmëroi shqyrtimin e vendosjes së forcave të veta në Kosovë, në bazë të Rezolutës 1244 të Kombeve të Bashkuara.