Policia e Kosovës ka njoftuar se gjatë kësaj të hëne, është arrestuar një person i dyshuar për shkaktim të rrezikut të përgjithshëm.
“Sot rreth orës 07:30, kemi pranuar informatën për një incident zjarri në fshatin Peran të Podujevës”, ka njoftuar Policia e Kosovës.
Në njoftim thuhet se nga zjarri dyshohet se është përfshirë një dyqan (mobileri), në katin e sipërm të një pompe derivatesh dhe më pas, zjarri ka filluar të marrë përmasa më të gjera të shpërndarjes, duke përfshirë edhe pompën e derivateve.
“Në këtë rast janë shkaktuar vetëm dëme materiale, nuk është raportuar për persona të lënduar”, thuhet tutje në njoftim.
Mes tjerash, Policia ka njoftuar se në vendngjarje kanë dalë zjarrfikësit dhe policia, të cilët kanë bërë lokalizimin e zjarrit si dhe evakuimin e personave të atë zonë.
“Bazuar në vlerësimet nga terreni, në vendngjarje janë angazhuar zyrtarë të FSK-së, KEDS-it, zyrtari i komunës për hetimin e shkaqeve të zjarrit, të cilët në bashkëpunim me policinë dhe prokurorin janë marrë me rastin”, vijon njoftimi.
Ndërkaq, pas hetimit preliminar në koordinim me prokurorin e shtetit, është arrestuar një person i dyshuar, i cili është dërguar në mbajtje dhe ndaj tij, është inicuar rasti për shkaktim të rrezikut të përgjithshëm.