Aspirata për anëtarësim në Bashkimin Evropian si një nga organizatat më të mëdha ndërkombëtare, për kryeministrin e Kosovës, Albin Kurti, nuk do të jetë e fundit.
Pas dorëzimit të aplikimit për në BE, kreu i ekzekutivit ka thënë se në vitin e ardhshëm (2023), Kosova do të përgatitet të integrohet në oraganizata ndërkombëtare, me një synim të veçantë në Partneritetin për Paqe (NATO).
“Në vitin e ardhshëm do të përgatitemi që sa më shumë të integrohemi në organizata ndërkombëtare e një synim të veçantë e kemi Partneritetin për Paqe, ku është jo vetëm fqinji ynë verior, i cili ka qëndrim negativ ndaj NATO-s, por edhe shtetet si Bjellorusia, e nuk është Republika e Kosovës”, ka thënë Kurti.
Sipas tij, është e domosdoshme që Kosova të hyjë në Programin për Partneritetin për Paqe.
Kurti ka theksuar se Kosova e ka dëshmuar veten edhe sa u përket vlerave politike e të demokracisë, por edhe e ka demonstruar përgatitjen sa i përket mbrojtjes dhe kapaciteteve ushtarake.
“Partneriteti për Paqe është gjëja e ardhshme për aplikimin tonë. Sa i përket pranimit të aplikimit dhe realizimit të anëtarësimit aty ka më shumë faktorë, në anën tjetër ka më shumë punë që bëhet e nuk dihet sidomos nga ministria jonë e Punëve të Jashtme dhe e Diasporës përmes lobimeve që ne i realizojmë në takime të dendura me shtetet të cilat e kanë të drejtën vendimmarrjes sa i përket aplikimit tonë”.
“Pas aplikimit për Këshill të Evropës, pas aplikimit për anëtarësim në BE, shpresojmë që ta bëjmë hapin e radhës sa i përket NATO-s, ku i kemi 4 shtete mosnjohëse, për dallim nga BE-ja ku janë 5 shtete mosnjohëse”, shtoi Kurti.
Kosova aplikoi të enjten për anëtarësim në Bashkimin Evropian.
Ceremonia u mbajt në ndërtesën e Qeverisë çeke në Pragë, ndërsa dokumentin e aplikimit e pranoi ministri për Çështje Evropiane i Çekisë, Mikulash Bek.
Një ditë më herët, udhëheqësit e Kosovës, përfshirë kryeministrin Kurti, presidenten Vjosa Osmani dhe kryetarin e Kuvendit, Glauk Konjufca, e nënshkruan aplikimin në Prishtinë, duke e cilësuar këtë si “hap historik” për Kosovën.