26 vjet burgim qe dënimi që një ditë më parë që Gjykata Speciale ia shqiptoi për krime lufte ish-komandantit të UÇK-së, Salih Mustafa.
Komandant “Cali” fajtor u shpall për veprat: vrasje e paligjshme, ndalim arbitrar dhe torturë.
Ani pse në Kosovë nga qytetarë e politikanë ky dënim është kritikuar, ai është mirëpritur nga Shtetet e Bashkuara të Amerikës.
Zëdhënësi i Departamentit Amerikan të shtetit, Ned Price, ka thënë se ky dënim është një hap që i ndihmon Kosovës për të garantuar sundim të ligjit dhe për të vënë drejtësi për viktimat.
“Siç e ka thënë edhe trupi gjykues, ky vendim nuk është gjykim kundër UÇK-së apo Kosovës, mirëpo lidhet vetëm me përgjegjësinë penale të të pandehurit. Ne po ashtu e përshëndesim trimërinë e viktimave individuale dhe dëshmitarëve që janë paraqitur, dhe dënojmë kërcënimet dhe frikësimet ndaj tyre. Pa këta individë të guximshëm, drejtësia nuk do të ishte e mundshme”, ka thënë Price.
Fondi për të Drejtën Humanitare në Kosovë vlerëson se dënimi i Musfatës është i lartë krahasuar me praktikën gjyqësore të mëhershme.
Derisa reagimin e SHBA-së, Amer Alija nga ky fond e quan të pritshëm.
“Po zakonisht të themi shtetet demokratike gjithmonë i respektojnë vendimet gjyqësore dhe ata nuk lëshohen në komentimin e vendimeve në qoftë se është vërtetuar me të drejtë ose jo gjendja faktike. Për këtë arsye ekzistojnë edhe shkalla e dytë edhe e tretë e proceseve gjyqësore në rast se kemi pasur gabime në vërtetimin e gjendjes faktike apo gabime procedurale atëherë palët kanë të drejtë të apelojnë vendimin në shkallën e dytë”, ka thënë Alija.
Nga ana tjetër, Instituti i Kosovës për Drejtësi, që gjithashtu monitoron punën e Speciales, po pret publikimin e aktgjykimit për të parë arsyetimin e këtij dënimi të ashpër.
“Ajo çka më së shumti në këtë fazë mund të lind dyshime lidhet lidhur me lartësinë e dënimit prej 26 vite burgim, në kundërshtim me parimin bazë të zbatimit të ligjit më të favorshëm për të pandehurin, kur në bazë të ligjit të aplikueshëm në Kosovë, i obligueshëm për tu zbatuar edhe nga Gjykata Speciale”, ka Medina Kadriu nga IKD.
Veprat për të cilat është dënuar Sali Mustafa, sipas gjykatës, janë kryer në kompleksin e ndalimit në Zllash në Kosovë, në prill të vitit 1999.