Në lagjen e komuniteteve në fshatin Gjyrkoc të Shtimes, mëngjesin e ditës së parë të dimrit kalendarik, Kryeministri i Republikës së Kosovës, Albin Kurti, së bashku me Kryetarin e Komunës së Shtimes, Qemajl Aliu, dhe Ministrin e Administrimit të Pushtetit Lokal, Elbert Krasniqi, kanë përuruar parkun dhe këndin e lodrave.
Parku dhe këndi i lodrave u përurua në prani të fëmijëve, mësuesve, qytetarëve e banorëve të Gjyrkocit.
“Në prani të fëmijëve, mësuesve e qytetarëve shqiptarë dhe ashkalinjë, banorë të Gjyrkocit, u përurua parku me sipërfaqe 2.200 metra katrorë”, thuhet në njoftimin e Kryeministrisë së Kosovës.
Tutje, në njoftimin e Zyrës së Kryeministrit është treguar se ky projekt është realizuar pas dy muaj e gjysmë punë.
“Për vetëm dy muaj e gjysmë, në bashkëfinancim të Ministrisë së Administrimit të Pushtetit Lokal dhe Komunës së Shtimes, është realizuar ky park me mbi 70% hapësira gjelbëruese, me 570 pemë të mbjella, 9 lloje të ndryshme të lodrave, 52 shtylla ndriçimi, parking për vetura dhe 330 metra katrorë shtigje për ecje”, përfundohet në njoftimin e Zyrës së Kryeministrit.