Policia e Kosovës përmes një komunikate për media, lidhur me protestën e mbajtur në Rudar, ka njoftuar se deklarimet se autobusë me protestues janë penguar nga policia janë të pavërteta.
Sipas tyre, protesta kaloi e qetë dhe pa incidente.
Në këtë protestë sipas policisë morën pjesë rreth një mijë e 500 pjesëmarrës.
“Referuar deklarimeve dhe publikimeve të disa mediumeve se gjoja autobusë me protestues të cilët kishin për qëllim shkuarjen në protestën e paraparë të mbahet në Rudarë të Zveqanit, janë penguar nga Policia e Kosovës, janë të pavërteta dhe nuk qëndrojnë”, thuhet në njoftim.
“Sipas vlerësimeve në terren rreth orës 13:00, protesta ka përfunduar e qetë, pa ndonjë incident të raportuar dhe në të kanë marrë pjesë rreth 1.500 pjesëmarrës”.
Sipas policisë, gjatë realizimit të detyrave dhe autorizimeve ligjore në funksion të garantimit të ligjit dhe sigurisë, një autobus është ndaluar sipas procedurave të kontrollit rutinor.
“Gjatë verifikimit të dokumenteve disa persona nuk kanë pranuar të legjitimohen nga autoritetet kompetente, prandaj në mënyrë vullnetare (me vetëdëshirë) nuk kanë vazhduar tutje”, vijon njoftimi.
Policia e Kosovës, siç ka njoftuar përmes komunikatës së saj para fillimit të protestës, ka theksuar njohjen e së drejtës ligjore për të protestuar në mënyrë të qetë nga secili qytetar si dhe angazhimet policore në respektimin e të drejtave dhe lirive njerëzore pa dallim.