Ngjarja e rëndë që ka ndodhur në Spitalin e Pejës 10 ditë më parë po vazhdon të hetohet nga institucionet e drejtësisë por tashmë edhe nga ato shëndetësore.
Për ngatërrimin e foshnjës me çarçafët e futjen e tyre së bashku në rrobalarëse, nga puna janë suspenduar 7 punonjës.
Pas shkarkimit të Kryeinspektorit shëndetësor nga MSH-ja një ditë më parë, të premten Spitali i Pejës ka dalë me njoftim se nga detyra janë liruar edhe Shefi i repartit dhe kryeinfermierja e Gjinekologjisë në Pejë.
Sot, si vazhdim i masave disiplinore është shkarkuar Shefi i Repartit të Gjinekologjisë dhe Kryeinfermierja e Repartit të Gjinekologjisë, ndërsa që presim përfundimin e të gjitha procedurave tona disiplinore, por sidomos edhe gjetjet e autoriteteve ligj zbatuese të përfshira në hetim për të ndërmarrë veprimet e mëtutjeshme ndaj cilitdo të përfshirë në këtë rast.
Detaje të reja thonë se nuk mund të ndajnë nga Prokuroria e Pejës meqë rasti është në fazë hetimore.
“Është njëri ndër rastet më të ndjeshme, pasi kemi të bëjmë me një foshnje dhe njëkohësisht duhet të jemi më të rezervuar në informata, besoj që është në interesin e të gjithëve që rezultat të dalin të suksesshme”, ka thënë Shkodran Niqki.
Por, i pakënaqur me trajtimin institucional ndaj këtij rasti është deputeti i PDK-së Bekim Haxhiu.
“Deri sa nuk ka pasur publikim të rastit në media nuk ka pasur masa disiplinore, pra masat disiplianre që janë marrë aps publikim të rast janë ëpr shkak të asaj që mediat e kanë publikuar. Nuk ishte veprim institucional”, ka thënë Haxhiu.
Përderisa ish-ministri i Shëndetësisë, deputeti i LDK-së Armend Zemaj skandal edhe më të madh e quan tentim fshehjen së këtij rasti.
“Personat teknik mund të kenë përgjegjës të drejtpërdrejtë, ndërsa personat menaxherial, politik janë përgjegjësit kryesor të fshehjes të këtij rasti, dhe tentimi për të fshehur dështimet në sektorin e shëndetësisë”, ka thënë Zemaj.
Kryetarja e Komisionit të Shëndetësisë, deputetja e Lëvizjes Vetëvendosje, Fatmire Kollçaku Mulhaxha nuk ka pranuar të flasë rreth kësaj çështje, duke thënë shkurt se organet përgjegjëse po e trajtojnë me prioritet.