Shefi i Grupit Parlamentar të AAK-së, Besnik Tahiri, ka thënë se vlera e koeficinetit të Ligjit të Pagave duhet të jetë 129 euro, në mënyrë që të shpëtohet.
Në një konferencë për media, gjersa nuk kurseu kritikat kundrejt Qeverisë Kurti, Tahiri ka thënë se askush nuk do t’i besojë tregimit të Kurtit, lidhur me kalkulimin e tejzgjatur të këtij ligji.
“Ka pasur dilema… u trajtua në diskutime… u miratua nga presidentja, dhe kryeministri thotë se jemi duke e kalkuluar? Po si ka logjikë që 6 muaj të mos kalkulohet kur dihet sa është buxheti, kur dihet vlera e koeficineteve, kur dihet vlera e tyre, renditja, dhe del kryeministri të mashtrojë 80 mijë njerëz? Kush mendon se do t’i besojë këtij tregimi? Askush!”, ka deklaruar Tahiri, gjersa ka theksuar se nëse Qeveria ka për qëllim që ky ligj të mos implimentohet, ajo duhet ta thotë troç.
Krahas kësaj, Tahiri ka thënë se vlera e koeficientit duhet të jetë 129 euro, në mënyrë që të mos ketë rënie drastike të pagave.
“AAK-ja e ka një porosi për kryeministrin dhe Qeverinë, në mënyrë që ky ligj të shpëtohet…vlera e koeficintit duhet të jetë 129 euro, në mënyrë që të mos ketë rënie drastike të pagave”, ka deklaruar Tahiri.
Ndërkaq, ai ka thënë se duhet të ketë një përjashtim për gjyqtarët dhe prokurorët, ngase për ta tashmë ekziston një vendim i Gjykatës Kushtetuese. Sipas Tahirit, vendimi i Gjykatës Kushtetuese është më kredibil dhe më superior ndaj ligjit në fjalë.
Të premten e 9 dhjetorit, është miratuar në parim, Projektligji për paga në sektorin publik me 68 vota pro.