Të premten e 9 dhjetorit është miratuar në parim Projektligji për paga në sektorin publik me 68 vota pro.
Me miratimin e këtij projektligji, sipas prezantimit të projektligjit nga ana e Qeverisë zvogëlohet hendeku mes pagës më të ulët dhe më të lartë në vend, ku koeficientin më të lartë të pagës do ta ketë posti i presidentit.
Koeficienti më i lartë i pagave do të jetë 18 për presidentin, ndërsa më i ulëti do të jetë 3.78. Por ende nuk është bërë e ditur vlera e koeficientit, që ishte thënë se do të caktohet në të njëjtën kohë me Ligjin për Buxhetin.
Kryetari i Kuvendit, Glauk Konjufca ka thënë se 68 deputetë kanë votuar për këtë projektligj, 68 vota për, asnjë kundër dhe asnjë abstenim.
“Kërkojmë nga komisioni funksional dhe komisionet e përhershme që ta shqyrtojnë dhe t’ia paraqesin kuvendit raportin me rekomandime”, ka shtuar Konjufca.
Që ky ligj të kalojë në fuqi, Qeveria ka thënë se duhet të kalojë një muaj.