Ministri i Mbrojtes i Ukrainës, Oleksii Reznikov, ka thënë se shteti i tij, është një anëtar de facto i aleancës ushtarake NATO.
Kjo pasi sipas tij vendet perëndimore, që dikur kanë qenë të shqetësuara se ndihma ushtarake e tyre për Ukrainën mund të shihej si një përshkallëzim nga Rusia, kanë ndryshuar “mënyrën e tyre të të menduarit”.
Në një intervistë për BBC, Reznikov ka thënë është i sigurt se Ukraina do të marrë armët e kërkuara nga shtetet anëtare të NATO-s, duke përfshirë tanke dhe avionë luftarakë, pasi si Ukraina, ashtu edhe Rusia, po përgatiten për ofensiva të reja në pranverë.
“Ukraina si një vend dhe forcat e armatosura të Ukrainës, u bënë anëtare të NATO-s, de facto, jo de jure, me ligj. Sepse ne kemi armë dhe e dimë se si t’i përdorim ato”, ka thënë ai.
Presidenti i Rusisë, Vladimir Putin e ka cilësuar pushtimin e tij në Ukrainë si një betejë ekzistenciale kundër vendeve perëndimore që duan të dobësojnë Rusinë.
Figura ruse kanë argumentuar se po luftojnë NATO-n në Ukrainë, pasi Perëndimi e ka furnizuar vendin me armë në atë që ata e shohin si një luftë agresioni.
Ukraina, për vite me radhë, ka kërkuar të bashkohet me NATO-n, diçka që presidenti Putin e ka përshkruar si një kërcënim sigurie për Rusinë.
Presidenti ukrainas, Volodymyr Zelensky ka lobuar për pranim të shpejtë, por është e paqartë nëse anëtarësimi i plotë është diçka që anëtarët e aleancës do ta konsiderojnë seriozisht edhe pas përfundimit të luftës, pavarësisht premtimeve për mbështetje.
Megjithatë, Reznikov mohoi që komentet e tij do të shiheshin si të diskutueshme, jo vetëm nga Rusia, por ndoshta edhe nga vetë NATO, pasi aleanca e udhëhequr nga ShBA, edhe pse mbështet Ukrainën, ka ndërmarrë hapa që të mos shihet si palë në konflikt.
“Pse [do të ishte] e diskutueshme? Është e vërtetë. Është një fakt,” tha Reznikov. “Jam i sigurt se në të ardhmen e afërt do të bëhemi anëtarë të NATO-s, de jure”, ka vijuar ai.
Ndryshe, Rusia filloi pushtimin e Ukrainës më 24 shkurt.