Kryeministri i Kosovës, Albin Kurti, është pritur në takim nga Ipeshkvi i Ipeshkvisë së Kosovës, imzot Dodë Gjergji, të martën e 24 janarit.
“Në takim u theksua përkushtimi i Qeverisë për garantimin dhe respektimin e plotë të lirisë fetare, në mënyrë të barabartë, për të gjithë qytetarët e Republikës së Kosovës”, thuhet në njoftimin e Kryeminsitrisë.
Tutje në njoftim thuhet se kryeministri Kurti ka shprehur mirënjohje për përkrahjen dhe kontributin e dhënë nga Ipeshkvia e Kosovës.
“Ai e falënderoi Ipeshkvin për bashkëpunimin për Projektligjin për Liritë Fetare”, thuhet tutje në njoftim.
Mes tjerash thuhet se duke biseduar për rëndësinë e rregullimit të statusit juridik të Kishës Katolike, është konfirmuar përkushtimi i Qeverisë për ta rregulluar përmes ligjit.
“Në takimin e përbashkët me këshilltaren ligjore të Kryeministrit, Tea Blakaj Hoxha, u bisedua për liritë fetare dhe trashëgiminë kulturore. U ritheksua mbrojtja e tyre përmes Kushtetutës së Republikës së Kosovës dhe ligjeve të veçanta”.