Ministria iraniane e Mbrojtjes, ka njoftuar se ka penguar një sulm me dron në një objekt ushtarak në qytetin e Isfahanit.
Siç shkruan BBC, nga ky dikaster është thënë se të përfshirë në këtë sulm ishin tre dronë, teksa shton se nuk kishte viktima.
Një dron u shkatërrua nga sistemet e mbrojtjes ajrore dhe dy u kapen nga “kurthet mbrojtëse”, duke shkaktuar dëme të vogla në një ndërtesë, thuhet në njoftimin e ministrisë.
Ministri i Jashtëm i Iranit, Hossein Amir-Abdollahian, teksa e quajti sulm “frikacak”, ka thënë se ishte një përpjekje për të destabilizuar vendin.
Megjithatë, sipas tij incidenti nuk do të ndikojë në “vendosmërinë dhe synimin e Iranit në lidhje me përparimin paqësor bërthamor”.
Ai vjen në mes të tensioneve të rritura mbi programin bërthamor të Iranit dhe furnizimin e tij me armë për luftën e Rusisë në Ukrainë.
Vendi është përfshirë gjithashtu nga trazirat e brendshme muajt e fundit, të nxitur nga vdekja e një gruaje që u arrestua për shkelje të kodit të rreptë të veshjes të Iranit.
Në një deklaratë për mediat shtetërore iraniane, ministria e mbrojtjes tha se sulmi me dronë ndodhi të shtunën në mbrëmje rreth orës 23:30 me kohën lokale.