Kryetari i Partisë Demokratike të Kosovës (PDK), Memli Krasniqi ka bërë të ditur se të martëën vizitën zyrtare në ShBA e ka nisur në Kongresin Amerikan, ku ka marrë pjesë në forumin e organizuar nga kongresmenët, Robert B. Aderholt dhe Pete Sessions, nën moderimin e Fatmir Mediut, me temë “Si ti kundërpërgjigjemi agresionit rus në Ukrainë dhe ndikimit dashakeq të Kinës në Evropë”.
I pari i PDK-së ka thënë se më prezencë të shumë kongresmenëve amerikanë, me zyrtarë nga të gjitha shtetet e rajonit, por edhe nga Ukraina, Gjeorgjia, Moldavia, shtetet baltike dhe të tjera që janë nën kërcënimin direkt rus, ka diskutuar për qëndrimet e PDK-së në lidhje me zhvillimet aktuale gjeopolitike.
“Bashkëpunimi i mirëfilltë rajonal dhe mbarë-evropian, politik e ushtarak, në koordinim të plotë me ShBA-të, është i domosdoshëm për ruajtjen e sigurisë në vendet tona dhe për ndërtimin e një të ardhmeje të sigurt për të gjithë”, ka shkruar Krasniqi në Facebook.