Qëndrimi që kryeministri Albin Kurti mbajti të hënën në takimin me Miroslav Lajçak, i ka pëlqyer emisarit evropian, për dallim nga takimet e mëhershme.
Diplomati sllovak ka thënë se pranimi i planit evropian nga Kurti, hap rrugën që diskutimet të barten në Bruksel.
“Më vjen mirë që edhe Kosova tani e ka pranuar në parim propozimin evropian. Do të vazhdojmë diskutimet në takime të nivelit të lartë”.
Të martën, pas Lajçakut, qëndrimin e Kurtit e ka mirëpritur edhe ambasadori amerikan, Jeffrey Hovenier.
Ai ka thënë se marrëveshja e përkohshme do të sjellë përfitime të konsiderueshme për Kosovën dhe Serbinë.
“SHBA-ja është e inkurajuar dhe mirëpret vendimin e Kosovës që po ashtu ta pranojë në parim propozimin e Bashkimit Evropian dhe do të vazhdojë të ofrojë mbështetjen e plotë për dialogun e lehtësuar nga BE-ja”, ka thënë Hovenier.
Por, arsyen e gjithë kësaj buje për deklarimin e kryeministrit nuk e ka të qartë kryetari i Kuvendit Glauk Konjufca.
Ai thotë se qëndrimi i Kurtit pro planit është i ditur tash e disa muaj.
Mirëpo, në këtë fazë, sipas Konjufcës, Kosovës i kanosen dy rreziqe.
“Është kompromis sepse nuk e ka njohjen legale, por është njohje ‘de-facto’, pra shtetësia e Kosovës nga Serbia nuk pranohet drejtpërdrejt, por në mënyrë të tërthortë. Kurse rreziku i dytë hiq i lehtë, duket që nuk e ka formën e marrëveshjes përfundimtare dhe pastaj kjo do të jetë taktikë e Serbisë me sekuencu”, ka thënë Konjufca.
Konjufca e ka pranuar se çdo ditë e më shumë, dialogu me Serbinë po lidhet me anëtarësimin e Kosovës në Këshillin e Evropës.
Kurse, për Asociacioni, ai thotë se duhet të gjendet një formë e re, e cila është në përputhje me Kushtetutën.