Chiara Ferragni është prezantuesja e edicionit të 73-të të Sanremos, Festivalit të Muzikës Italiane që, si rregull, vendos se kush do të jetë përfaqësuesi i vendit në Eurovision.
Blogerja e famshme italiane është shoqëruar nga kantautori Gianni Morandi dhe së bashku kanë prezantuar atë që ka qenë nata e parë e këtij eventi.
Për një rast si ky, Chiara është bashkuar me Dior dhe drejtoreshën e tij kreative, Maria Grazia Chiuri, për veshjet e saj dhe kanë krijuar së bashku katër pjesë ikonike që do t’i shohim gjatë gjithë Festivalit, të cilat tashmë i ka prezantuar në rrjete sociale.
Një nga krijimet dhe ndoshta më goditja është ajo që ata e kanë quajtur “fustani kundër urrejtjes” – i bardhë me mesazhe të vërteta ‘urrejtjeje’ që Ferragni ka marrë në rrjetet e saj sociale.
“Me këtë fustan sjellim në skenën e Teatrit Ariston disa nga kritikat e drejtuara ndaj Chiaras për pamjen, trupin dhe mbi të gjitha lirinë e saj për t’u ndjerë si grua dhe nënë.
Frazat e urrejtjes të qëndisura me të zeza janë fyerjet e vërteta që mer në Instagram çdo ditë”, ka thënë ndër të tjera Ferragni.
“Të tërheqësh vëmendjen për të drejtat e grave, trupat e tyre dhe mënyrën se si trupi i gruas ende është i diskutueshëm. Ky është objektivi që qëndron pas kësaj pamjeje”.
Ferragni ndërkohë veshi një fustan tjetër në gjysmën e mbrëmjes dhe është një krijim ‘nudo’ nga Dior.
Fustani, riprodhon trupin e Ferragni, në një stil që të jep iluzionin e lakuriqësisë.
Më pas, Chiara u rishfaq në skenë me një krijim të katërt të Diorit, një kostum i qëndisur me kristale të veshur me një fund tyli të tejdukshëm.
Fundi simbolizon një kafaz, në formën e një burgu të përbërë nga paragjykimet e imponuara nga një shoqëri që vijon të jetë patriarkale.
Në mbrëmjen madhështore duket se ylli i famshëm përveç prezantimit, ishte aty edhe për të dhënë disa mesazhe të forta.
