Zëvendëskryeministri i Kosovës, Besnik Bislimi, ka thënë se plani evropian për normalizimin e marrëdhënieve Kosovë -Serbi, nënkupton “de facto” njohjen e dy shteteve.
Ai ka theksuar se kryeministri i Kosovës, Albin Kurti, gjatë takimit të fundit me emisarin e BE-së për dialogun Kosovë-Serbi, Miroslav Lajçak, ka diskutuar vetëm për propozimin evropian, dhe jo për marrëveshjet e arritura në dialog.
“Ajo që Kurti ka nxjerrë pas takimit është informatën që ai është dakord me platformën e propozuar nga plani franko-gjerman me mbështetje të SHBA-ve, por platforma vetëm tregon principet dhe veprimet bazë, ndërkaq gjithçka që ka të bëjë me implementimin e saj duhet të diskutohet në aneksin implementues mes palëve në Bruksel”, ka thënë Bislimi.
Sipas tij, ky plan i tregon kornizat bazë që nënkupton njohjen de facto të dy shteteve.
“Nuk ka pasur diskutim për asnjë marrëveshje paraprake, por për kornizën e propozimit franko-gjerman. 6 kushtet që ka propozuar Kurti janë parakushte që tregojnë se mund të diskutohet për mekanizmin e avancuar të mbrojtjes dhe të drejtave të minoriteteve. BE-ja ka vërejtjet e saj në dy kushte, por se cilat janë ato mund ta pyesni Lajçak kur është në Prishtinë”, shtoi ai.