Mëngjesin e së martës, në Kosovë ka mbërritur gazetarja e pestë afgane, Nadia Gulabzada.
Kështu ka bërë të ditur Asociacioni i Gazetarëve në Kosovë, përmes një postimi në Facebook.
“Gulabzada u mirëprit në aeroport nga bashkëkombësja e saj Amina Omid, tanimë e strehuar në Prishtinë prej një javësh, kryetari i Bordit të AGK-së, Xhemajl Rexha, përfaqësuesi i MPB-së, Kushtrim Nreci, dhe zyrtarë të Policisë së Kosovës”, thuhet në njoftim.
Gazetarët afganë janë strehuar në Kosovë, në kuadër të programit “Journalists in Residence – Kosovo”, inicuar nga European Centre for Press and Media Freedom ECPMF, e që financohet nga Qeveria e Republikës së Kosovës.
“Në kuadër të këtij programi, përveç strehimit, gazetarëve afganë u sigurohet pagë mujore, shërbime shëndetësore, si dhe biletë kthimi kur rrethanat do të krijohen që të njëjtit të kthehen në shtëpitë e tyre”, vijon njoftimi.
Ndryshe, Asociacioni i Gazetarëve të Kosovës – AGK, ka njoftuar se kryetari i Bordit të AGK-së, Xhemajl Rexha dhe drejtoresha Ekzekutive e AGK-së, Getoarbë Mulliqi Bojaj, së bashku me zyrtaren Ligjore të ECPMF-së, Flutura Kusari, përfaqësuesi i MPB-së, Kushtrim Nreci dhe zyrtarë të Policisë së Kosovës, i kanë pritur gazetarët afganë në Kosovë.
Sipas AGK-së, gazetarët afganë janë mirëpritur në aeroport një muaj pas vendimit të Qeverisë për strehimin e tyre në Kosovë.
“Gazetarëve do t’u sigurohet strehim, pagë mujore, sigurim shëndetësor dhe biletë kthimi, kur rrethanat të krijohen që ata të kthehen në shtëpitë e tyre”.
“Amina Omid, Ahmad Shaker, Nimatullah Gholami dhe Raifullah Nikzad – janë katër gazetarët afganë që kanë mbërritur sonte në Kosovë, në kuadër të programit ‘Journalists in Residence – Kosovo’”.