Sindikata e Pavarur e Radio Televizionit të Kosovës (RTK) ka njoftuar se mediumi publik është gjobitur me tre mijë euro nga Inspektorati i Punës.
Arsye për këtë del të jetë për “degradimin e paligjshëm të kryetarit të Sindikatës, Fadil Hoxha”.
“Inspektorati i Punës e ka dënuar Radiotelevizionin e Kosovës me tre mijë euro gjobë për degradimin e jashtëligjshëm të kryetarit të Sindikatës Fadil B.Hoxha”, thuhet në njoftimin e Sindikatës.
Sindikata e ka mirëpritur vendimin teksa kanë shtuar se RTK po dëmtohet financiarisht nga veprimet e papërgjegjshme të menaxhmentit.
“SPRTK- e mirëpret këtë vendim të Inspektoratit për ndëshkimin e paligjshmërisë, por në anën tjetër është e shqetësuar për dëmin financiar që po i shkaktohet Radiotelevizionit të Kosovës për shkak të veprimeve të papërgjegjshme të menaxhmentit”, thuhet në njoftim.
Sindikata po ashtu ka kërkuar nga Bordi i RTK-së që ta thërras në përgjegjësi Menaxhmentin, “për dëmin material dhe jomaterial që po ua shkakton të punësuarve të RTK-së si dhe për dëmtimin e buxhetit dhe imazhit të RTK-së”.