Kryeministri i Kosovës, Albin Kurti, nuk ka dhënë detaje lidhur me takimin e tij në Bruksel me presidentin e Serbisë, Aleksandër Vuçiq.
Deputetja e Partisë Demokratike të Kosovës, Ariana Musliu-Shoshi, drejtuar kryeministrit ka pyetur se cilat janë temat e diskutimit në takimin e së hënës, më 27 shkurt.
Sipas Kurtit, plani franko-gjerman nuk është produkt i negocimit dhe as i përfshirjes së kërkesave negociuese të palëve.
“E kam pranuar parimin të cilin e kanë kërkuar ndërmjetësit evropianë, e ajo është transparenca e procesit, konfidencialiteti i bisedimeve. Rrjedhimisht përmbajtjen tekstuale e kam ndarë me kryetarët e partive opozitare, por jo edhe në kuvend, ndonëse besoj që pas shumë muajve pothuajse asgjë nuk ka ngelur e panjohur nga ai propozim që paraqet bazën e mirë për diskutime të mëtutjeshme që fillojnë të hënën”.
“Nuk është produkt i negocimit propozimi, meqenëse më 18 gusht të vitit të kaluar është hapur tema e kornizës së përgjithshme të marrëveshjes pa pasur takime. Nuk është që ne kemi negociuar dhe është sjellë propozimi. Nuk është as produkt i përfshirjes së kërkesave negociuese të palëve”, tha Kurti.
Ndryshe, Kurti dhe Vuçiq, do të takohen më 27 shkurt në Bruksel në kuadër të dialogut, ku do të diskutojnë për propozimin e Bashkimit Evropian për normalizimin e raporteve.
Në faqen zyrtare të Zyrës për Politikë të Jashtme dhe Siguri, Josep Borell dhe Miroslav Lajçak, është bërë e ditur se fillimisht do të zhvillojnë takime të ndara me Kurtin e Vuçiqin.
Këto takime do të fillojnë në orën 15:00 dhe më pas do të ketë një takim të përbashkët.
“Në takim do të diskutohet për propozimin e BE-së për normalizim të raporteve në mes të Kosovës dhe Serbisë”, thuhet në njoftim.
Në fund të takimit bëhet e ditur se do të ketë deklaratë për media nga përfaqësuesi i lartë i BE-së, Josep Borrell.
Pjesëmarrjen në takim e kanë konfirmuar edhe Kurti, edhe Vuçiq.
Ndryshe, përfaqësuesi i lartë i Bashkimit Evropian për Punë të Jashtme dhe Politikë të Sigurisë, Josep Borrell, ka thënë se shpreson që Kosova dhe Serbia të pranojnë propozimin evropian, si rrugë për normalizim të marrëdhënieve.