Kryetari i Partisë Demokratike të Kosovës, (PDK), Memli Krasniqi, në njëvjetorin e luftës në Ukrainë ka shprehur solidaritetin dhe mbështetjen e plotë për popullin ukrainas dhe për presidentin e Ukrainës, Volodymyr Zelensky.
Krasniqi ka deklaruar se shteti kosovar është me Ukrainën dhe se stabiliteti dhe shpirti luftarak i ukrainasve, sipas tij, ka fituar zemrat e gjithë botës demokratike.
“Në njëvjetorin e luftës në Ukrainë, respektivisht agresionit të paprovokuar të Rusisë ndaj këtij vendi, shprehim solidarizimin dhe mbështetjen e plotë për popullin ukrainas dhe presidentin Zelensky. Qëndrueshmëria dhe shpirti luftarak i ukrainasve ka fituar zemrat e të gjithë botës demokratike dhe popujve liridashës”, ka shkruar ai në një postim në rrjetin social Facebook.
Gjithashtu, i pari i PDK-së ka thënë se historia ka treguar vazhdimisht se popujt që luftojnë për të drejtat e tyre dalin gjithmonë fitimtarë.
“Uroj që ky agresion i cili ka marrë jetën e mbi 8 mijë civilëve ukraianas deri më sot, prej tyre 487 fëmijëve, të përfundojë sa më parë. Kosova është me ju”, është shprehur ai.
Në shkurt të vitit 2022, Rusia pushtoi Ukrainën, duke shkaktuar një krizë të rëndë ndërkombëtare. Tashmë, një vit më vonë, shumë pyetje mbeten ende pa përgjigje: si ka ndryshuar gjendja në Ukrainë dhe në rajon, si po reagojnë vendet e tjera dhe cila është perspektiva e ardhshme?
Presidenti ukrainas, Zelensky ka mbajtur një fjalim në rastin e njëvjetorit të agresionit rus në Ukrainë. “Vit dhimbjeje, pikëllimi, besimi dhe bashkimi. Vit i pathyeshmërisë sonë”, është shprehur Zelensky. Ndërsa, ka falënderuar të gjithë që ndihmuan Ukrainën në këtë një vit për ta rezistuar sulmin rus.