Kryeministri i Kosovës, Albin Kurti, ka shprehur ngushëllimet e tij për vdekjen e ish-drejtorit të ndërmarrjes Trepça dhe ekspertit të minierave, Nazmi Mikullovci.
Nëpërmjet një postimi në rrjetin social Facebook, Kurti ka thënë se emri i tashmë të ndjerit Mikullovci, mbetet i lidhur përjetësisht me Kosovën, ekonominë dhe industrinë e saj.
“Nazmi Mikullovci është përfaqësuesi i një gjenerate të jashtëzakonshme profesionistësh që projektuan dhe realizuan në masë të gjerë vetëqëndrueshmërinë ekonomike të Kosovës”, ka shkruar Kurti në Facebook.
Po ashtu, ai ka thënë se të gjithë e njohin atë si drejtor të Trepçës në vitet e shkëlqyera të industrializimit të vendit.
“Ndërsa shumë nga ne si orientuesin e përpiktë se si të optimalizohen mundësitë vendore në industri dhe ekonomi”, ka shkruar tutje Kurti.
Ai ka thënë se për të ka qenë më shumë se një bashkëpunëtor në më shumë se një dekadë, duke e quajtur edhe mentor të dijes për Kosovën dhe ekonominë e saj.
I ndjeri së fundmi ishte pjesë e Bordit të Agjencisë Kosovare të Privatizimit (AKP), ndërsa veprimtarin e tij politike e kishte vazhduar me Lëvizjen Vetëvendosje.
Mikullovci nga viti 1965 gjer më 1990 ka punuar në Trepçë, nga ku është larguar gjatë kohës së masave të dhunshme.
Në vitin 1991 kishte themeluar shtypshkronjën e parë në Kosovë, e cila posedonte makina Flexo Print dhe udhëhoqi kompaninë deri në vitin 1999.
Pas çlirimit, më saktë nga viti 2001 gjer më vitin 2008, ka qenë në pozitën e Drejtuesit në Trepçë.