Kryetari i Lidhjes Demokratike të Kosovës (LDK), Lumir Abdixhiku, në fjalimin e tij në seancën solemne për nder të 25-vjetorit të Epopesë së UÇK-së, ka thënë se 25 vjet më parë në Prekaz, familja Jashari po e mbronte pragun e shtëpisë dhe se thirrja e familjes Jashari kumbon sot e asaj dite.
“Siç thoshte edhe Rugova: Adem Jashari dhe familja e tij po e mbronin pragun e shtëpisë. Një popull që e do lirinë, do ta fitonte atë një ditë. Thirrja e familjes Jashari kumbon edhe sot. Na vjen si thirrje për ribashkim të brendshëm dhe atdhedashuri”, ka deklaruar Abdixhiku.
Sipas tij, qëllimi i shuarjes së trungut familjar të Jasharëve një çerekshekull më parë, ishte qëllimi i shuarjes së popullit të Kosovës.
“Sot në përvjetorin e 25-të kujtojmë të gjithë të rënët për liri. I nderuari baca Rifat Jashari, sot, në Prekaz më tha se ‘dhimbjen e kemi kapërcyer’. Por, qëllimi i shuarjes i trungut tuaj familjar një çerekshekulli më parë, ishte qëllimi i shuarjes së vetë popullit të Kosovës. Qëndresa juaj atëherë ishte rilindja jonë kombëtare. Rilindja juaj sot si familje me breza të rinj, është qëndresë e jona që na mban në rrugën përpara”, ka vijuar ai.