Pasi Prokuroria Speciale e Republikës së Kosovës ka njoftuar për arrestimin e të pandehurit me inicialet Z.A., nacionalitetit serb, i cili dyshohet se ka kryer krime ndaj popullatës civile gjatë luftës në Kosovë, ka reaguar ministri i Punëve të Brendshme, Xhelal Sveçla.
“Kryesit e akteve kriminale ndaj popullatës së pafajshme nuk janë dënuar asnjëherë për këto krime ose janë dënuar minimalisht”, ka theksuar Sveçla, duke shtuar se drejtësia është domosdoshmëri dhe se “është e vonuar, por është e pashmangshme”.
Ministri i Punëve të Brendshme, Xhelal Sveçla, ka thënë se “krimet që janë kryer gjatë luftës në Kosovë as nuk i harrojmë e as nuk i falim”, dhe se drejtësia për secilin akt çnjerëzor ndaj popullatës së pafajshme është e pashmangshme.
“Sot jam njoftuar se është arrestuar një qytetar i nacionalitetit serb që akuzohet se gjatë vitit 1999, në cilësi të personit zyrtar, ka ushtruar dhunë, torturë e keqtrajtim ndaj civilëve të pafajshëm shqiptarë. I njëjti po ashtu akuzohet se në bashkëpunim me struktura paramilitare serbe ka marrë pjesë edhe në dëbimin dhe shpërnguljen me dhunë të qytetarëve të Kamenicës”, ka shkruar ministri Sveçla.
Ministri Sveçla ka potencuar se Serbia ka kryer gjenocid në Kosovë dhe ky është një fakt i njohur botërisht.
Arrestohet një serb për krime lufte kundër popullatës civile në Kosovë