Ankesën në Gjykatën e Apelit, për ashpërsim të dënimit ndaj ish-kunatit të saj, tashmë e ka dërguar Elvedina Hajdari.
Një ditë më parë, Gjykata Themelore në Prishtinë, dega në Drenas, dënoi me 3 muaj burgim, A.H, për shkelje të urdhërit mbrojtës.
Elvedina Hajdari thotë se ende jeton me pasojat që i shkaktoi, ish kunati ndonëse kishte urdhër mbrojtje të lëshuar nga Gjykata, që ai të mos i afrohej.
“Ende flej në ankth, se kur e kujtoj atë moment se qysh e kam përjetuar se si ka deshur të më shkelë me veture, por të mos isha largu për gjysmë metra, nuk isha shpëtu pa lëndime serioze, e ndoshta kisha vdek”, ka thënë Hajdari, viktimë e dhunës në familje.
Ajo shpreson se Apeli do ashpërsoj dënimin ndaj tij dhe se familjarët e ish bashkëshortit nuk do e shqetësojnë më.
“3 muaj janë pak, por shpresoj që bëhet i plotëfuqishëm edhe e vuan dënimin, por unë e kam bërë ankesën dhe pres që Apeli, meja ashpresu shumë.”, ka vijuar ajo.
Jo të duhur, vendimin e Themelores, e konsiderojnë edhe nga Kolektivi për mendim dhe Veprim feminist.
“Rasti i fundit, me 3 muaj burgim, përkundrazi që vendimet më të mëdhaja janë me kusht, ku vendim gjithsesi që është me burgim, është i ulët për shkak të rrethanave që kanë ndodhë, sepse ai ka dashur të e shkelë me veture, dhe e ka pasur fëmijën me vete.”, ka thënë aktivistja, Fjolla Muqaj.
Hajdari, është në proces gjyqësor edhe me ish-bashkëshortin e saj, për të njëjtën vepër penale, derisa ai tashmë është i dënuar por jo me burgim efektiv për dhunën që i kishte shkaktuar asaj ndër vite.
Përpos ish-bashkëshortit e ish-kunatit, Gjykata ka lëshuar urdhër mbrojtje edhe ndaj ish-vjehrrit të saj.
Institucionet e drejtësisë në Kosovë, shpesh kanë qenë cak i kritikave për shkak se nuk i kanë trajtuar seriozisht rastet që kanë pasur urdhër mbrojtje.
Rasti më tragjik ishte ai ku vitin e kaluar Hamide Magashi dhe foshnja e saj e palindur u vranë në oborrin e QKUK-së nga ish-burri i saj.