Kryetari i Partisë Demokratike të Kosovës (PDK), Memli Krasniqi ka njoftuar se ka pritur dy Përfaqësuesit Special të Norvegjisë dhe Sllovenisë për Ballkanin Perëndimor, Arne Sannes dhe Anzej Franges, të shoqëruar nga ambasadorët e të dy shteteve në Republikën e Kosovës.
“Njësoj sikur në takimet e fundit me përfaqësues të shteteve dhe misioneve të ndryshme në Kosovë, edhe në këtë takim diskutuam për situatën aktuale politike në vend dhe propozimin evropian tashmë të pranuar nga Kryeministri Kurti”, ka shkruar Krasniqi.
Krasniqi ka thënë se qëndrimi i PDK-së është “konsistent dhe i pandryshueshëm” në raport me procesin e dialogut.
“Kosova ka pasur nevojë për një marrëveshje finale, gjithëpërfshirëse, ligjërisht dhe ndërkombëtarisht të obligueshme. Fatkeqësisht, kjo marrëveshje jo vetëm që nuk është finale, por parasheh asociacionin në qendër dhe jo njohjen ndërsjellë – duke zvarritur pafundësisht konfliktin e ngrirë me Serbinë”, ka shtuar kreu i PDK-së.
Sipas tij, përgjegjësia e plotë bie “mbi lidershipin e dobët të Kryeministrit Kurti, i cili, përkundër mbështetjes që i kemi ofruar për dy vjet me radhë në procesin e dialogut dhe në raport me Serbinë, ai ka dështuar që të arrijë përmbushjen e qëllimeve shtetërore të Republikës së Kosovës”.