Ka përfunduar takimi i përbashkët midis kryeministrit të Kosovës, Albin Kurti, presidentit të Serbisë, Aleksandër Vuçiq dhe ndërmjetësuesve të Bashkimit Evropian, Josep Borrell dhe Miroslav Lajçak, në Ohër të Maqedonisë së Veriut.
Kështu ka bërë të ditur ekipi nga RTV Dukagjini, i cili është duke raportuar nga Ohri.
Takimi ka zgjatur pak më shumë se një orë.
Para takimit trepalësh, Borrelli e Lajçaku kanë takuar ndaras kryeministrin e Kosovës dhe presidentin e Serbisë.
Së pari, presidenti i Serbisë, Aleksandër Vuçiq, u takua me përfaqësuesin e lartë të BE-së për politikë të jashtme, Josep Borrell e emisarin e BE-së për dialogun Kosovë – Serbi, Miroslav Lajçak.
Pastaj, ata kanë pritur në takim kryeministrin e Kosovës, Albin Kurti.
Në agjendë të këtij takimi kanë qenë diskutimet për zbatimin e propozimit të BE-së për normalizimin e marrëdhënieve Kosovë-Serbi.
Pas këtij takimi, pritet të ketë deklaratë për media nga kryediplomati Borrell dhe nga liderët Kurti e Vuçiq.