Kryetari i Partisë Demokratike të Kosovës, Memli Krasniqi, teksa e ka komentuar raportin e Departamentit Amerikan të Shtetit për Kosovën, ka thënë se ky i fundit shpërfaq dështimin e Qeverisë Kurti për të ndërtuar institucione kredibile, të përgjegjshme dhe të pakorruptuara në njërën anë, dhe në anën tjetër, dështimin për krijuar një ambient ku vajzat dhe gratë janë të sigurta.
Me anë të një postimi në Facebook, Krasniqi ka theksuar se me Kurtin në qeverisje dhe Martinin si simbol të saj – raportet për Kosovën “do të vazhdojnë të përkeqësohen vazhdimisht”.
“Raporti fakton korrupsionin serioz qeveritar dhe mosndëshkimin e rasteve të tilla, mungesën e hetimit dhe përgjegjësisë për dhunën me bazë gjinore, përfshirë dhunën në familje apo dhunën seksuale, dhe ngre shqetësimin se si zyrtarë të korruptuar vazhdojnë të mbajnë pozicione të larta në sektorin publik”, shkroi Krasniqi.
Sipas tij, kjo është historia e vërtetë e kësaj Qeverie, e cila, në dy vitet e fundit ka prodhuar “vetëm skandale që kanë prekur të gjithë sektorët: qeverisjen, ekonominë, shëndetësinë, arsimin, diplomacinë e sigurinë”.
Padyshim, si emërues i përbashkët i cili vulos të gjitha këto gjetje që karakterizojnë Qeverinë Kurti, siç thotë Krasniqi mbetet ambasadori i Kosovës në Kroaci, Martin Berishaj.
“Berishaj, përkundër raportimeve, fakteve dhe akuzave, vazhdon të mbetet në detyrë pa dhënë asnjëherë llogari për miliona euro të shpërdoruara e të dyshimta”, shtoi Krasniqi.