Themeluesi i grupit të tifozëve “Torcida”, Shefqet Begu ka ftuar të gjithë qytetarët e Kosovës që më 2 prill, nga ora 14:00, të jenë në Prishtinë për t’iu bashkuar marshimit për drejtësi kundër Gjykatës Speciale në mbështetje të ish-liderëve të Ushtrisë Çlirimtare të Kosovës (UÇK).
Ai i ka quajtur ish-udhëheqësit e UÇK-së simbol të luftës së pastër dhe, sipas tij, shqiptarët e kanë obligim ta mbrojnë këtë të vërtetë historike me përkushtim deri në vendosjen e drejtësisë.
“Hashim Thaçi, Kadri Veseli, Jakup Krasniqi, Rexhep Selimi dhe bashkëluftëtarët e tyre në Hagë, janë çlirimtarët tanë, janë simbol i luftës së pastër të UÇK-së, dhe ne e kemi për obligim që ta mbrojmë me përkushtim këtë të vërtetë historike derisa drejtësia të vihet në vend”, ka thënë Begu.
Kujtojmë se, të dielën, më 2 prill, në Prishtinë, platforma “Liria ka emër” organizon marsh qytetar dhe solidarizues në mbështetje të luftës së drejtë të UÇK-së dhe ish-krerëve të saj, Hashim Thaçi, Kadri Veseli, Jakup Krasniqi, Rexhep Selimi dhe bashkëluftëtarët e tyre në Hagë.
Marshi do të niset nga sheshi “Zahir Pajaziti” dhe do të vazhdojë në drejtim të sheshit “Skënderbeu”.
Ideatorët e platformës “Liria ka emër”, Eliza Hoxha dhe Ismail Tasholli, kanë thënë se ish-krerët e UÇK-së nuk janë duke u përballur me procesin gjyqësor për shkak të emrave të tyre të përveçëm, por për shkak se me emrat e tyre lidhet epoka më e ndritur e historisë sonë të re.