Bordi i Zyrës së Rregullatorit të Energjisë (ZRrE), të enjten ka vendosur tarifat e reja të energjisë elektrike.
Me tri vota për Bordi i ZRRE-së ka vendosur që çmimi i rrymës të shtrenjtohet për 15.4%, për të gjitha kategoritë pa përjashtim, ndërsa do të zbatohet nga data 1 prill deri më 31 mars 2024.
Nëpërmjet një njoftimi në Facebook, ZRrE ka bërë të ditur se qëllimi i përcaktimit të tarifave është pasqyrimi i kostove të shërbimit për secilin aktivitet të sektorit të energjisë elektrike, në mënyrë që të garantohet siguria dhe vazhdimësia e furnizimit me energji elektrike.
“Tarifat e energjisë elektrike të aprovuara reflektojnë koston e shërbimit për secilin aktivitet ashtu që të mos cenohet siguria dhe vazhdueshmëria e furnizimit me energji elektrike. Tarifa e aprovuara duhet te mbulojnë kostot investive të nevojshme në Termocentralet, investimet në rrjetin e Transmetimit dhe Shpërndarjes, reflektimin e kostove me shumicë dhe të operimit”, thuhet në njoftim.
Sipas ZRrE-së faktorët që kanë ndikuar në rritjen e kostove të furnizimit, janë:
- Rritja e çmimeve të energjisë elektrike në tregjet ndërkombëtare. Edhe pse në vitin 2023 çmimet e energjisë elektrike në tregjet evropiane shënuan rënie në krahasim me vitin 2022, ato vazhdojnë të jenë më të larta në krahasim me çmimet që mbulojnë tarifat aktuale.
- Kapacitetet e kufizuara gjeneruese në vend për të plotësuar kërkesën në rritje detyrojnë Kosovën të blejë sasi më të mëdha të energjisë elektrike në tregun rajonal dhe ndërkombëtar.
- Shkalla shumë e lartë e inflacionit, nga 0.25% deri në 1.75% në periudhën 2018 deri 2020, në 8.39% në vitin 2022, ndikoi në rritjen e konsiderueshme të kostove tek furnizuesit e energjisë elektrike.
Ndër të tjera, ZRrE-ja ka njoftuar të gjithë konsumatorët se çmimet e reja të energjisë do të aplikohen për sasinë e energjisë së konsumuar nga 1 prilli 2023.