Presidentja e vendit, Vjosa Osmani, në 15-vjetorin e miratimit të Kushtetutës së Kosovës, ka thënë se Kushtetuta është frymëzim për liritë dhe të drejtat qytetare.
“Kushtetuta jonë është frymëzim për liritë dhe të drejtat qytetare, për barazi para ligjit dhe vlera të tjera, përmes të cilave, kjo kushtetutë na mban brenda familjes së madhe evropiane”, ka thënë Osmani.
Osmani ka thënë tutje se është detyrë e përbashkët që nëpërmjet ruajtjes së sovranitetit, integritetit territorial, respektimit të vullnetit të popullit dhe garantimit të lirive qytetare pa dallim, t’i mbrojmë dhe avancojmë këto vlera, duke u bazuar gjithnjë në frymën dhe shkronjën e Kushtetutës.
“Mbetet detyrë dhe prioritet i yni i përbashkët që me punë e përkushtim, t’i respektojmë dhe zbatojmë këto vlera kushtetuese, të cilat ndër të tjera janë edhe shpërfaqje e identitetit tonë”, ka deklaruar Osmani.