Të mërkurën ka nisur mbledhja e parë e Konferencës së Kryetarëve, për zgjedhjen e Presidentit të Republikës së Shqipërisë.
I pranishëm në mbledhje është kreu i Grupit Parlamentar të Partisë Demokratike(PD), Enkelejd Alibeaj, i cili ka kërkuar që mbledhja të bëhet në prezencën e medias.
Alibeaj u shpreh se procesi duhet të jetë gjithëpërfshirës dhe transparent.
Siç e parashikon edhe Kushtetuta, raundi i parë i votimit duhet të mbahet pas shtatë ditësh, pas mbledhjes së parë.
Për këtë çështje, kreu i grupit opozitar ka thënë se pas konsultimeve me dy grupet tjera opozitare parlamentare, ata kanë refuzuar që raundi i parë i votimit të ndodhë.
Ai propozoi datën 10 maj si datë, për nisjen e procesit të Presidentit të ri.
Deri në raundin e tretë, palët mund të votojnë një emër konsensual. Nëse deri në raundin e tretë nuk votohet ky emër atëherë, mazhoranca mund ta zgjedhë e vetme me 71 vota në raundin e katërt dhe të pestë.
Kryeministri i Shqipërisë, Edi Rama ka përjashtuar mundësinë që presidenti i ri të jetë nga grupi parlamentar i Partisë Socialiste, ndërsa deri më tani asnjë prej grupeve parlamentare nuk ka mbështetur publikisht një kandidat të caktuar.
Gjithashtu, është bërë e ditur se mbledhja zhvillohet në Kryesinë e Kuvendit.