Presidentja e Kosovës, Vjosa Osmani, ka dekoruar të enjten post mortem me urdhrin “Hasan Prishtina”, ideologun, politikanin, filozofin dhe liderin Arbën Xhaferi, në një ceremoni të organizuar në Ambasadën e Kosovës në Shkup, ku të pranishëm ishin edhe disa nga pjesëtarët e familjes së tij.
“Arbën Xhaferi do të kujtohet e vlerësohet përherë për vetëdijen e lartë intelektuale, artikulimin politik largpamës, mbrojtjen dhe promovimin e të drejtave njerëzore e kombëtare të shqiptarëve në Kosovë dhe sidomos në Maqedoninë e Veriut si dhe për afirmimin e orientimit properëndimor të kombit shqiptar në frymën e rilindësve tanë”, ka thënë Osmani, njofton presidenca.
Në emër të familjes së Arbën Xhaferit, i biri i tij Iliri, falënderoi presidenten Osmani për respektin institucional të treguar ndaj filozofit, intelektualit dhe liderit Arbën Xhaferi.