Prokuroria Speciale ka dhënë detaje në lidhje me aksionet e sotme të cilat janë realizuar nga Policia e Kosovës.
Në njoftimin e Prokurorisë thuhet se janë bastisur 12 lokacione të ndryshme, me qëllim të sigurimit të provave.
“Me urdhër të Prokurorisë Speciale të Republikës së Kosovës, Policia e Kosovës, respektivisht Drejtoria për Hetimin e Krimeve Ekonomike dhe Korrupsionit, bazuar në urdhër kontrollin e Gjykatës Themelore në Prishtinë, sot, në orët e hershme ka filluar kontrollin në dymbëdhjetë (12) lokacione të ndryshme, me qëllim të sigurimit të provave”, thuhet në njoftim.
Prokuroria Speciale njofton se kontrolli është realizuar në pronat e të dyshuarve H.H, V.M, D.K, L.M, XH.L, A.J, G.SH, B.P, A.M, B.B dhe D.B., të cilët në cilësinë e personave zyrtarë, dyshohet se kanë kryer veprën penale “Keqpërdorim i pozitës apo autoritetit zyrtar”, “Lidhja e kontratës së dëmshme” dhe “Mashtrimi”.
Gjithashtu, ekziston dyshimi i arsyeshëm se është keqpërdorur detyra zyrtare, nga zyrtarët e përfshirë në këtë proces, nga faktet se si janë zhvilluar procedurat e përshpejtuara për ndërtimin e katër objekteve afariste dhe banesore, vlera e të cilave kalon 120 milionë euro.
Gjatë zbatimit të urdhër kontrollit në dymbëdhjetë lokacione të ndryshme, janë sekuestruar prova materiale, të cilat do të jenë të rëndësishme për procedurë të mëtutjeshme hetimore si: -17 dosje dhe dokumente që ndërlidhen me rastin – gjashtë laptopë – dy shtëpiza – 11 telefona, dy sim card dhe gjashtë usb.