Pasi Policia e Kosovës ka shpërndarë protestuesit, kryetari i komunës së Zubin Potokut, Izmir Zeqiri, ka arritur të hyjë brenda objektit të komunës.
Gjatë hyrjes së tij në komunë, Zeqiri është shoqëruar nga pjesëtarët e Policisë së Kosovës.
Fillimisht, u has në rezistencë, por policia shumë shpejt ka depërtuar në hyrje të objektit, duke e shpërndarë turmën.
Policia e ka thyer derën e komunës, e cila ishte e blinduar nga protestuesit.
Sipas ekipit të RTV Dukagjinit që po qëndron atje, ka disa protestues që janë lënduar. Aty është edhe autoambulanca, e cila e ka dhënë ndihmën e parë.
Për ta shpërndarë turmën, policia kishte përdorur sprej dhe gaz lotsjellës. Ndërkaq, u dëgjuan edhe të shtëna armësh disa herë.