Shtetet e Bashkuara të Amerikës mbështesin anëtarësimin e Kosovës në programin e Partneritetit për Paqe të NATO-s.
Përkrahjen amerikane për Kosovën dhe aspiratat e saj në këtë drejtim e ka deklaruar zëdhënësi i misionit të SHBA-së në NATO, Jeffrey Adler.
“Shtetet e Bashkuara të Amerikës mbështesin anëtarësimin e Kosovës në institucionet evropiane dhe euroatlantike, përfshirë edhe në Partneritetin për Paqe të NATO-s”, ka thënë Adler përmes një përgjigjeje me shkrim për REL.
Sipas tij, “të gjitha vendimet e Aleancës, përfshirë edhe për Partneritetin për Paqe, merren me konsensus”.
Ndërkaq, kryeministri i Kosovës, Albin Kurti, kishte paralajmëruar se Kosova së shpejti do të aplikojë për anëtarësim në Këshillin e Evropës dhe në Partneritetin për Paqe të Organizatës së Traktatit të Atlantikut të Veriut (NATO).
Këto komente Kurti i kishte bërë në Berlin, pas takimit të tij me kancelarin gjerman, Olaf Scholz.
Qeveria e Kosovës ka thënë se veçse ka formuar një grup punues për anëtarësimin në Partneritetin për Paqe.
Partneriteti për Paqe është një program i NATO-s, që synon krijimin e besimit midis shteteve anëtare të NATO-s dhe shteteve të tjera në Evropë.
Nga 30 vende anëtare të NATO-s, Kosovën si shtet të pavarur e kanë njohur 27 prej tyre ndërsa katër vende si, Greqia, Rumania, Sllovakia dhe Spanja ende nuk e kanë njohur pavarësinë e Kosovës.