Një i mitur ka qëlluar me armë zjarri në një shkollë fillore në Llukavac të Bosnje e Hercegovinës.
Lajmin e ka konfirmuar kryetari i komunës së Lukavacit, Edin Deliq. Me anë të një postimi në Facebook, Deliq ka bërë të ditur se në mesin e të lënduarve nuk ka fëmijë.
“Asnjë fëmijë nuk është lënduar nga të shtënat në shkollën në Lukavec. Ka disa njerëz të lënduar. Nuk ka fëmijë në mesin e tyre, prandaj prindër, ju lutem të mos bëni panik. Autori është fëmijë i mitur dhe është arrestuar menjëherë. Një ditë e vështirë”, ka thënë Deliq në Facebook.
Siç raporton REL, nga Qendra Klinike Universitare e Tuzllës kanë njoftuar se një nga të lënduarit është tashmë në operacion.
“Pacienti me inicialet O.N. është shtruar në Qendrën Klinike Universitare të Tuzllës për shkak të plagës me armë zjarri në qafë. Pacienti është intubuar dhe operacioni është në zhvillim e sipër”, kanë njoftuar nga Qendra Klinike Universitare e Tuzllës.