Kryeministri i Kosovës, Albin Kurti, ka reaguar në lidhje me vërshimet që kishin përfshirë qytetin e Pejës, gjatë mbrëmjes të së shtunës. Dhe si pasojë e këtyre vërshimeve mbetën të vdekur dy persona.
Kurti ka thënë se kjo është humbje e madhe për Kosovën, duke shprehur ngushëllimet e tij dhe të Qeverisë familjes dhe miqve të viktimave.
“Me pikëllim të thellë mora lajmin për humbjen tragjike të jetëve të dy qytetarëve tanë, Dion Ademaj dhe Mirsada Ademaj, nga vërshimet e mbrëmshme në Pejë. Kjo humbje e madhe për familjet Ademaj dhe Hoxhiq është humbje e madhe për vendin tonë. Në këto ditë të rënda, dhembjen e ndajmë bashkë me familjarët dhe miqtë e tyre. Në emër të Qeverisë së Republikës së Kosovës dhe në emrin tim personal, ju shpreh ngushëllimet më të sinqerta. Të lënduarve u uroj shërim sa më të shpejtë”, ka shkruar Kurti në Facebook.
Ai ka shtuar se Qeveria e Kosovës është e angazhuar me kapacitet e saj që t’iu dalë në ndihmë qytetarëve të prekur nga vërshimet.
“Qeveria e Republikës së Kosovës është e angazhuar me kapacitetet e saj me Forcën e Sigurisë së Kosovës dhe Agjencinë për Menaxhimin e Emergjencave që të ndihmojë në përballimin dhe tejkalimin e pasojave të vërshimeve. Ministri i Mbrojtjes, Armend Mehaj, Ministri i Punëve të Brendshme, Xhelal Sveçla dhe Ministri i Administrimit të Pushtetit Lokal, Elbert Krasniqi, janë në komunikim me Komunën e Pejës për të koordinuar veprimet në ofrim të mbështetjes së nevojshme”, ka shtuar Kurti.