Lokalin e hapë herët në mëngjes e punën e vazhdon deri në orët e vonshme.
Lulzim Sadiku tash jeton në jug ndërsa me pjesën veriore, përpos banesa ku u rrit e bashkon edhe lokali në lagjen e boshnjakëve.
Mbi një dekadë punë në këtë biznes, për Sadikun nuk kanë qenë të lehta, në veçanti vitet e fundit.
“Po zakonisht kur nuk ka tensioni mirë shkon puna, është më gjallë dalin njerëzit janë më të lirë, por sidomos kur ndodhin shpërthime e këto, njerëzit nuk dalin”, ka thënë Lulzim Sadiku, Pronar i byrektores.
Përkundër vështirësive financiare burekgjiu Sadiku është shumë i lumtur që këndej pari janë shtuar forcat e rendit.
“Me praninë e tyre ne ndihemi më të sigurt, si në biznes si në shtëpitë tona, si në jetën e përditshme si në çdo aspekt. E kish me qenë mirë me qenë sa më prezent, sepse kështu është më sigurt për çdo person që jeton këtu”, shtoi ai.
Shumë afër kësaj lagje, në orët e para të së hënës u dëgjua një shpërthim, i dyti brenda pak ditësh.
Më 29 qershor afër këtij udhëkryqi ishte djegur një kioskë e cila kohë pas kohe shërbente si pikë statike për Policinë e Kosovës. Ndërkaq të hënën pas mesnatës prapa këtyre ndërtesave është dëgjuar një shpërthim tjetër.
Menjëherë pas shpërthimit Policia e Kosovës është vënë në lëvizje.
“Sot rreth orës 01:00 ka pasur një shpërthim ose detonim tek lagja te tre rrokaqiejve, Policia ka reaguar në vend të ngjarjes. Sidoqoftë nuk kemi pasur mundësi me e gjetë vendin e shpërthimit apo detonimit. Kemi kërku në atë pjesë por nuk ka pasur. Që do të thotë sipas të gjitha gjasave ka qenë një shpërthim i mjeteve piro-teknike ose shok-bombe që nuk ka shkaktuar dëme material ose lëndime në njerëz”, tha Veton Elshani- Zv.Drejtori i Përgjithshëm i Policisë për veriun.
Përkundër që policia nuk ka identifikuar ndonjë të dyshuar, Lista Serbe pretendon se e di qëllimin e këtij shpërthimi.
Sipas partisë së udhëhequr nga Goran Rakiqi, sulmi është bërë qëllimshëm për të arsyetuar praninë e shtuar të forcave speciale të armatosura.
Në reagimin përmes llogarisë zyrtare në Facebook, Lista Serbe pretendon se forcat speciale po i frikësojnë qytetarët, madje duke propaganduar se po kryhet represion dhe arrestime të pa-baza.
Kjo parti ka bërë thirrje KFOR-it e EULEX-it t’i shtojnë forcat e tyre në veri, me qëllim të parandalimit të incidenteve.