Armend Mehaj, ministër i Mbrojtjes, së fundi ka reaguar për lajmin se ushtarit hungarez të KFOR-it, i cili u sumlua nga grupet kriminale serbe nga trazirat në veri, i është amputuar këmba.
Mehaj përmes një postimi në faqen e tij zyrtare në Facebook, ka shprehur keqardhje për ushtarin hungarez dhe njëkohësisht ka kërkuar që për grupet kriminale përgjegjëse ndaj këtij sulmi të merret dënim meritor.
“Shpreh keqardhjen time me rastin e pranimit të informacionit se ushtarit hungarez të KFOR-it, të lënduar nga ane e grupeve kriminale serbe gjatë protestave në Zveçan, për shkak të gjendjes së rënduar shëndetësore, është dashur që t’i amputohet këmba nga ana e mjekëve të Institutit Kombëtar të Rehabilitimit Mjekësor në Hungari”, ka shkruar Mehaj.
Derisa kërkon dënimin meritor për grupet përgjegjëse, Mehaj thekson se asgjë “s’do të zmbrapsë ushtrimin e rendit dhe ligjit”.
Mediat hungareze raportojnë se të gjithë ushtarët e tjerë, të cilët kanë qenë të plagosur, kanë pasur mundësi të shkojnë në shtëpi, përpos dy prej tyre, të cilët janë në gjendje të rëndë dhe po trajtohen në spital.