Kryeministri i Kosovës, Albin Kurti, ka thënë se miratimin e Ligjit për pagën minimale, punëtorëve po u sigurohet të hyra që u mundësojnë jetë të dinjitetshme.
Kurti tha se nga kjo rritje përfitojnë rreth 100 mijë punëtorë “ndërsa nga heqja e shkallës së parë tatimore do të përfitojnë të gjithë punëtorët”.
Ligjin e miratuan deputetët e Kuvendit të Kosovës, me 61 vota pro, asnjë kundër e asnjë abstenim.
“Me miratimin në lexim të dytë në Kuvend, mundësohet rritja e pagës minimale. Nga 130 euro e 170 euro, në 264 euro bruto për të gjithë. Për punëtorët nën 35 vjeç, rritje e pagës minimale për 103%, ndërsa për punëtorët deri në 65 vjeç rritje për 55%. Po ashtu hiqet tatimi në të ardhurat personale për pagat deri në nivelin e pagës minimale”, ka thënë ai.
Ndryshe, jashtë këtij ligji kanë mbetur veteranët e luftës së UÇK-së. Pas miratimit, ka reaguar Faton Klinaku nga organizata e veteranëve, duke paralajmëruar masa që do t’i ndërmarrin si organizatë.