Kryeministri i Kosovës, Albin Kurti, ka thënë se Qeveria e Kosovës e ka ofruar një draft për themelimin e Asociacionit, që sipas Kurtit është sikurse modeli kroat.
“Ne kemi ofruar një draft vizion për komunitetin serb në Kosovë, i cili është frymëzuar nga modeli kroat i vetëmenaxhimit përmes Këshillit Kombëtar Serb”, ka theksuar Kurti.
Kurti ka thënë se Kosova nuk ia plotëson dëshirën Beogradit që të themelojë Republika Srpska, se kjo është arsyeja pse Vuçiqi nuk dëshironte të dëgjonte.
“Por presidenti i Serbisë, Aleksandar Vuçiq nuk donte të dëgjonte për të apo ta lexonte. Ai dëshiron bashkimin e komunave me shumicë serbe kundër shtetit tonë, siç është bërë në Bosnje dhe Hercegovinë në vitin 1991. Në Kosovë 4% e popullsisë janë serbë. Por ata kanë 10 nga 38 komuna, kanë 10 vende të rezervuara nga 120 në Parlament dhe kanë 17 për qind të asambleistëve komunal në komunat tona. Po ashtu, gjuha serbe është gjuhë zyrtare në mbarë Kosovën në të gjitha nivelet e administratës. Do të thotë, në Kosovë ka diskriminim pozitiv, por Beogradi dëshiron Republikën Srpska brenda Kosovës. Kjo, sigurisht, nuk është e mundur”, ka shtuar kryeministri Kurti.