Asociacioni i Gazetarëve të Kosovës (AGK) ka njoftuar se do të mbajë një protestë me datën 31 korrik, duke filluar nga ora 12:00 në sheshin “Zahir Pajaziti”. Sipas AGK-së, kjo protestë do të jetë për mbrojtjen e fjalës së lirë.
Kjo protestë vije si shenjë revolte pas pezullimit të certifikatës së biznesit të Klan Kosova nga Ministria e Industrisë, Ndërmarrësisë dhe Tregtisë.
“Asociacioni i Gazetarëve të Kosovës me mbështetjen e medieve dhe organizatave të shoqërisë civile, më 31 korrik, e hënë, do të mbajë protestë në shenjë revolte për pezullimin e certifikatës së biznesit të Klan Kosova nga Ministria e Industrisë, Ndërmarrësisë dhe Tregtisë”, thuhet në njoftimin e AGK-së.
Motoja e kësaj proteste do të jetë “Demokracia vdes në errësirë”.
Sipas AGK-së, kjo protestë do të jetë paqësore.
Ministria e Industrisë, Ndërmarrësisë dhe Tregtisë (MINT), të premtën e 28 korrikut, përmes një njoftimi bëri të ditur se Komisioni për Shqyrtimin e Ankesave për Regjistrimin e Bizneseve ka marrë sot vendim për refuzimin e ankesës së Shoqërisë Tregtare “Klan Kosova sh.p.k.”.
Kështu, ky komision ka konstatuar se ARBK-ja “në shkallën e parë, ka vendosur në përputhje me ligjin kur e pezulloi certifikatën e biznesit të Klan Kosovës sh.p.k.”.
“Ministria e Industrisë, Ndërmarrësisë dhe Tregtisë njofton opinionin publik se Komisioni për Shqyrtimin e Ankesave për Regjistrimin e Bizneseve ka marrë sot vendim për refuzimin e ankesës së Shoqërisë Tregtare ‘Klan Kosova sh.p.k.'”, njoftoi Ministria e Industrisë, Ndërmarrësisë dhe Tregtisë.